Супрацоўнікі “Беларускага гістарычнага часопіса” наведалі сустрэчу з Галінай Левінай

11 ліпеня 2023 г. у Дзяржаўным літаратурна-мемарыяльным музеі Якуба Коласа ў межах праекта "Простыя словы" адбылася творчая сустрэча “Значнасць лiтаратурнага слова ў архiтэктурным асэнсаванні падзей” з беларускім архітэктарам Галінай Левінай.  У ёй удзельнічалі намеснік галоўнага рэдактара рэдакцыі часопіса “Беларускі гістарычны часопіс” Наталля Матусевіч і рэжысёр-пастаноўшчык сектара інфармацыйных сістэм і тэхналогій Аляксей Камкоў.

У гасціннай абстаноўцы коласаўскага дома дачка архітэктараў Леаніда Левіна і Наталлі Афанасьевай Галіна Леанідаўна Левіна распавяла аб значэнні Слова пры стварэнні мемарыялаў. Стваральнікі мемарыялаў лічылі, што  словы дапаўняюць аповед пра трагічныя гісторыі падзей вайны, і ў кожным месцы яны свае, унікальныя, злучэнні слоў з архітэктурай. Пералічым некаторыя з іх.

…У Мемарыяльным комплексе "Хатынь" − паэтычныя радкі беларускіх паэтаў Ніла Гілевіча і Петруся Броўкі, упершыню напісаныя для помніка вершы. На камянях помніка ахвярам Халакосту ў Слуцку − словы самога Леаніда Левіна. Г.Левіна адзначыла, што ён не выкарыстоўваў шаблонных і тыпавых тэкстаў. Ён шукаў “нерв” гісторыі кожнага мястэчка і вёскі, што спазналі жудасць ваеннага ліхалецця, у неабходных словах для такога месца памяці.

На сустрэчы гучалі радкі з успамінаў Леаніда Левіна пра Ніла Гілевіча, Сяргея Грахоўскага, Максіма Танка, Янку Брыля, Аркадзя Куляшова.

Намеснік галоўнага рэдактара Наталля Матусевіч уручыла Галіне Левінай нумар часопіса, у якім змешчана інтэрв’ю Леаніда Левіна “Народны Храм Памяці” (2009, № 7). Таксама былі абмеркаваны планы далейшага супрацоўніцтва і магчымасці новых публікацый.