Мерапрыемства «У пошуках страчанага: Архіўныя адкрыцці сучаснага купалазнаўства на старонках часопіса “Роднае слова”» адбудзецца 16 лістапада

Запрашаем на прэзентацыйнае мерапрыемства «У пошуках страчанага: Архіўныя адкрыцці сучаснага купалазнаўства на старонках часопіса “Роднае слова”», якое адбудзецца 16 лістапада 2023 года а 17-й у Дзяржаўным літаратурным музеі Янкі Купалы.

 
На гэты раз гаворка пойдзе пра архіўныя знаходкі 2023 года, якія тычацца біяграфіі Янкі Купалы, а таксама радаводу сям’і Луцэвічаў. Сярод іх, напрыклад, забытыя фотаздымкі з даваеннага друку, у тым ліку ўнікальныя кадры: Янка Купала разам з Якубам Коласам і беларускімі літаратарамі або надзвычай рэдкі сюжэт – паэт у рабочым кабінеце. Нарэшце, сенсацыйная знаходка – фотаздымак, на якім двухгадовы Ян Луцэвіч разам з бацькамі і сястрой. Да апошняга часу лічылася, што фота сям’і Луцэвічаў не захавалася. Цяпер можна ўбачыць, як выглядалі бацькі Янкі Купалы ў маладым узросце.

Знойдзены фотаздымак раскрыў пэўныя таямніцы, што дапаўняюць вядомыя звесткі з жыцця паэта і разам з тым аспрэчваюць некаторыя з іх. Як выглядаў маленькі Янка Купала? Колькі дзяцей было ў сям’і? Якія шлюбы сям’і Луцэвічаў маюць дакументальнае пацверджанне? Гэта толькі некаторыя з пытанняў, якія будуць абмяркоўвацца ў час сустрэчы, яе ўдзельнікамі стануць літаратуразнаўцы, музейныя супрацоўнікі, генеалогі і біёграфы Янкі Купалы – сталыя і будучыя аўтары “Роднага слова”.

Шчыра запрашаем на сустрэчу ўсіх, каго вабіць асоба Песняра і каму цікава пачуць меркаванні сучасных даследчыкаў-купалазнаўцаў.
Уваход вольны.