“Беларускі гістарычны часопіс” паўдзельнічаў у “Школе маладога вучонага” і ярмарцы студэнцкіх навукова-даследчых лабараторый гістарычнага факультэта БДПУ імя Максіма Танка

18 верасня 2023 г. на гістарычным факультэце БДПУ першакурснікам  прадставілі асноўныя накірункі дзейнасці студэнцкіх навукова-даследчых лабараторый “Кліа” (навуковы кіраўнік – А.А. Корзюк), “Рубікон” (навуковы кіраўнік – С.П. Шупляк,) “Спадчына” (навуковы кіраўнік – А.Ф. Рацько), “Памяць” (навуковы кіраўнік – А.В. Касовіч). Мадэратарамі сустрэчы былі намеснік дэкана па навуковай рабоце, дацэнт кафедры гісторыі Беларусі і славянскіх народаў Н.В. Барабаш і старшыня студэнцкага навуковага таварыства гістарычнага факультэта, удзельнік СНДЛ “Кліа” Анастасія Сталярова.

У якасці партнёра на мерапрыемстве выступіла намеснік галоўнага рэдактара “Беларускага гістарычнага часопіса” Наталля Уладзіміраўна Матусевіч. Яна расказала пра значнасць адзінага ў краіне навукова-тэарэтычнага, навукова-метадычнага часопіса ў развіцці айчыннай гістарычнай навукі і адукацыі на працягу 30 гадоў, ролю калектыву рэдакцыі ў фарміраванні студэнтаў як навукоўцаў, настаўнікаў,  музейных і архіўных работнікаў.

Студэнты з цікавасцю даведаліся пра штогадовую арганізацыю сумесна з супрацоўнікамі рэдакцыі і СНДЛ “Кліа” квэстаў “Мінск гістарычны: месцы памяці Вялікай Айчыннай вайны”, “Гісторыя беларускай дзяржаўнасці”, падрыхтаваных па матэрыялах “Беларускага гістарычнага часопіса”. Яны заахвоціліся паўдзельнічаць у сумесным мерапрыемстве “Ноч музеяў”, якое ладзіцца ў рэдакцыі і на базе музеяў г. Мінска.

Была дасягнута дамоўленасць аб далейшым навуковым і творчым супрацоўніцтве паміж рэдакцыяй “БГЧ” і выкладчыкамі, студэнтамі гістарычнага факультэта ў рамках Дамовы паміж выдавецтвам “Адукацыя і выхаванне” і БДПУ імя Максіма Танка.